كشف المطرب جورج وسوف العديد من الأسرار لأول مرة عن حياته الشخصية وتفاصيل لقائه الأخير مع نجله وديع، بجانب الحديث عن إمكانية دخول ابنته وزوجته مجال الفن.
وقال جورج وسوف في تصريحات تلفزيونية: فراق الحبايب صعب ولكن وفاة ابني قدر، وكنت بشكي لـ وديع همي، وعمري ما سبته ولا سابني، ووديع في عيوني حتى لو مات.
وفاة وديع جورج وسوف
أما عن آخر لقاء جمعه بـ نجله وديع، علق جورج وسوف، قائلا: وديع قالي أنه رايح يشوف الدكتور وجاي بعد نص ساعة، وفاتت النص ساعة ومجاش، وشوفت أنه مات قبل ما يقولوا مات وحسيت، والناس عزوني من قلبهم لأن وديع كان خدوم وطيب مع الكل.
وعلق جورج وسوف على تلاوة القرآن في عزاء نجله، قائلا: كلنا بنصلي إلى الله، وكلنا بنطلب الرحمة إلى الوديع وأنا مسيحي ولكن متسامح مع كل الأديان ومعرفش إلا المحبة.
كما تطرق جورج وسوف للحديث عن المهرجانات الشعبية، قائلا: الوضع الاقتصادي للناس السبب لأنهم عايزين يفرحوا ويرقصوا، ومفيش رقابة زي الأول، ومينفعش نقيم فنان أو أغنية في الزمن دا.
كما كشف جورج وسوف إمكانية جورج وسوف عن إمكانية دخول ابنته مجال الفن، قائلا: عيون بنتي عندها 9 سنين وبشوفها باستمرار وكل يوم معاها، وفرحت لما شوفتها في حفلي الأخير وكانت قاعدة مبسوطة ولكن قولتلها دي آخر مرة لما تكبري مفيش حفلات ولا بطيخ لأني متحفظ على الموضوع ده.
رفض دخول جورج وسوف ابنته مجال الفن
وواصل جورج وسوف: أعوذ بالله من دخول زوجتي ولا بنتي مجال الفن؛ لأن أمي ولا أخواتي عمرهم ما حضروا حفلاتي، ومعندناش الكلام ده، لأني مش بروح أسهر ده مجرد شغل، وتحدث جورج وسوف عن حفيدته، قائلا: الله رزقني حفيدتي في الأربعين بتاع وديع، وكان المفروض تتولد بعد أسبوع، ودي نعمة من الله.
كما كشف جورج وسوف حقيقة وجود خلافات بالوسط الفني، قائلا: الوسط الفني مفهوش خلافات والناس بتفتكر إن فيه خلافات بين الفنانين، ولكن ده مش حقيقي لأن الله كاتب رزق كل شخص، وبنختلف من باب الحب، وأغناني كتير ليا اتسرقت وبقول نصيبه ومعنديش مشكلة وعلى اللي جرى وقد الحروف كانوا ليا وراحت لشخص غيري، ولكن بقول دا نصيبهم وأنا حظي جميل في الحياة وربنا منحني أكتر مما أستحق، ووليد توفيق صديقي المقرب من الفنانين ومسابنيش ولا لحظة.
كما تحدث جورج وسوف عن ليلة التريو في الرياض: قائلا: اللي بيحصل في الرياض عمرنا ما شوفناه قبل كدا وتطور كبير، وليلة التريو نايت كانت تجربة تحفة وأتعرفت على فنانين مكنتش أعرفهم، ومحبتهم ليا كانت ظاهرة في عيونهم، وكانوا بيغنوا من قلبهم.
حقيقة خلاف أصالة وجورج وسوف
وأضاف جورج وسوف: أنا مشوفتش أصالة في التريو ولا سلمت عليا وأقسم بالله ما شوفتها، لأني طلعت على المسرح على طول وخلافي معاها زمان سببه إن كلامي كان قاسي عليهم وهي كانت ذوق معايا ومفيش خلاف بيني وبينها حاليا، وكلامي كان من باب المحبة، وكلمتني لما مات وديع وعزتني وأصالة بنت بلد وفنانة عظيمة، وأنا لم أستبعد إليسا من الغناء معي في التريو وأنا طلعت على المسرح لقيت الفنانين زي ما هما وعمري ما رفضت أغني معاها.
